პაროლები და ორფაქტორული ავთენტიფიკაცია — ბიზნესის პირველი ფარი

კომპანიის ანგარიშების გატეხვა ყველაზე ხშირად იწყება არა რთული შეტევით, არამედ სუსტი ან რამდენიმე სერვისზე განმეორებული პაროლით. საკმარისია, ერთ-ერთი საიტიდან პაროლი გაჟონოს — და თავდამსხმელი იმავე პაროლს თქვენს ელ-ფოსტაზე, ბუღალტერიის პროგრამაზე თუ Microsoft 365-ზე სცდის.

როგორი უნდა იყოს პაროლი

• სიგრძე — სირთულეზე მნიშვნელოვანია. მინიმუმ 12–14 სიმბოლო. უკეთესია ფრაზა, მაგალითად: ფანჯარა-ყავა-ლურჯი-2026.
• ყოველ სერვისზე — სხვა პაროლი. განმეორებადი პაროლი ყველაზე დიდი რისკია.
• ნუ იყენებთ სახელებს, დაბადების თარიღებს, კომპანიის სახელს ან 123456, qwerty ტიპის კომბინაციებს.
• ნუ წერთ პაროლებს სტიკერზე, Excel-ის ფაილში ან მესენჯერში. თუ პაროლის გაზიარება აუცილებელია — გამოიყენეთ ერთჯერადი, თვითგანადგურებადი ბმული, მაგალითად, ICOMP Pass-ის საიდუმლო ბარათი: ბმული ერთხელ წაკითხვის შემდეგ ქრება.

პაროლების მენეჯერი

ათობით უნიკალური პაროლის დამახსოვრება შეუძლებელია — ამისთვის არსებობს პაროლების მენეჯერი. ის პაროლებს ერთ, დაცულ ადგილას ინახავს, ასე რომ, ყოველ სერვისზე სხვა, რთული პაროლის გამოყენება მარტივი ხდება.

ჩვენი გუნდის პროდუქტი — ICOMP Pass — პირველი ქართული დაცული სეიფი. ორფაქტორული ავთენტიფიკაცია მასში სავალდებულოა, „პაროლების ჯანმრთელობის“ შემოწმება აჩვენებს სუსტ, განმეორებად და ძველ პაროლებს, შენახული პაროლები კი ცნობილ გაჟონვებებში მოწმდება — ისე, რომ პაროლი არსად იგზავნება.

ორფაქტორული ავთენტიფიკაცია (MFA)

MFA ნიშნავს, რომ პაროლის შემდეგ სისტემა დამატებით დასტურს ითხოვს — ტელეფონის აპლიკაციიდან ან ფიზიკური გასაღებიდან. თავდამსხმელს, რომელიც პაროლს იგებს, ეს მეორე ნაბიჯი შეაჩერებს.

პირველ რიგში ჩართეთ MFA:

1. კორპორატიულ ელ-ფოსტაზე (Microsoft 365, Google Workspace);
2. ბანკსა და ბუღალტერიის პროგრამაზე;
3. დისტანციურ წვდომაზე (VPN, Remote Desktop);
4. ადმინისტრატორის ანგარიშებზე — სერვერი, როუტერი, ჰოსტინგი, დომენი.

💡 რჩევა: SMS-კოდის ნაცვლად უკეთესია აპლიკაცია (Microsoft Authenticator, Google Authenticator) — SMS-ის ჩაჭრა შედარებით მარტივია.

ბიზნესისთვის: 3 წესი

• თანამშრომლის წასვლისას ყველა ანგარიში — ელ-ფოსტა, VPN, CRM, ფაილური სერვერი — გათიშეთ იმავე დღეს.
• ადმინისტრატორის უფლებები — მხოლოდ მათ, ვისაც რეალურად სჭირდება. ყოველდღიური მუშაობა — ჩვეულებრივი ანგარიშით.
• ანგარიშების სია — იცოდეთ, რომელ სერვისებს იყენებთ და ვის აქვს წვდომა.